Riikkaorganisašuvdna Same Ätnam (RSÄ)

Boarráseamos sámi váldoorganisašuvdna
Riikkaorganisašuvdna Same Ätnam lea boarráseamos sámi riikkaorganisašuvdna. Organisašuvdna vuođđoduvvui juo guovvamánu 3 b. 1945 Jåhkåmåhkes. Álgga Sáme Ätnam riikkaorganisašuvnna vuođđodeapmái váldui nu gohčoduvvon ”Stuorra sámi nuoraidkonferánssas” Suorssás njukčamánu 17-19 b. 1944.

Riikkaorganisašuvnna Same Ätnama ideologiija ja ulbmilat
Riikkaorganisašuvdna Same Ätnam bargá visot sámiid ovddas.

Njuolggadusaid mielde galgá Same Ätnam leahkit sámi váldoorganisašuvdna sámiid várás Ruoŧas.

RSÄ doibmii gullá demokráhtalaš vugiid mielde vuhtii váldit ja ovddidit sámi beroštumiid kultuvrralaččat, sosiálalaččat, rievttálaččat ja ekonomalaččat. RSÄ galgá doaimmalaččat doaibmat olahit daid ubmiliid mat leat mearriduvvon RSÄ ulbmilprográmmas ja iežá mearrádusaid riikkaorganisašuvnna riikkačoahkkimiin.  

Riikkaorganisašuvdna Same Ätnam – sámi servodathuksejeaddji
Riikkaorganisašuvdna Same Ätnam lea leamaš doaimmalaš organisašuvdna sámi servodathuksemis. Same Ätnam lea váldán álgaga Sámiráđđái, Sámi Duoji vuođđudussii, Sámiid oahpahusguovddážii, Sámeálbmot vuođđudussii, Gaaltije vuođđudussii, ja maid Ájtte duottar- ja sámidávvirvuorkái jus galgá namuhit moadde organisašuvnna ja institušuvnna.

Riikkaorganisašuvdna Same Ätnam dagai Sámedikki vejolažžan
Riikkaorganisašuvdna Same Ätnam leai maid vuosttaš sámi organisašuvdna mii ruoŧa ráđđehusa luhtte guđii gáibádusa álbmotválljen sámi orgána; Sámedikki, vuođđudeami birra. Vaikko Same Ätnam okto sámi organisašuvnnaid gaskkas guhkes áiggi ja vuostebiggii ražai jurdagiin sámi parlameantta birra, de lea mis otne Sámediggi Ruoŧas.

Riikkaorganisašuvdna Same Ätnam ja sámiid oahpaheapmi
Čađa jagiid lea Same Ätnam jođihan nanu álbmotoahpaheaddji doaimma ollu sámi surggiin. Same Ätnam lea čađahan logakeahtes logu gurssiid sámiduojis, oahpahusas, gielas ja ealáhusjearaldagain namuhastin dihte dušše moadde álbmotoahpahansurggiin maid Same Ätnam lea bargan jagiid mielde.

Riikkaorganisašuvdna Same Ätnam ja sámi giella
Sámi giella lea álohii ožžon doalahit sierra sajádaga Same Ätnama barggus ja boahtá dainna lágiin joatkit guhkes áiggi ovddos guvlui. Same Ätnamis leat leamaš sihke giellajuhkosat ja čállinjuhkosat. Lea maid leamaš mielde álggaheame oahpahusaid sámi gielas visot oahpahusdásiin ruoŧa servodagas.

Riikkaorganisašuvdna Same Ätnam ja boahtteáigi
Iežá jearaldagat maiguin Same Ätnam lea bargan ja main leat doaibman leat logakeahtes ollu. Bargu lea mielddisbuktán ollu positiivvalaš bohtosiid ja stuorra vuoittuid sámi álbmogii. Muhto, ollu gávdno ain dahkat Same Ätnamii sámi boahtteáiggi ovddas visot sámiid várás.

Riikkaorganisašuvnna Same Ätnama riikkačoahkkin – alimus mearrideaddji orgána
Same Ätnama alimus mearrideaddji orgána lea riikkačoahkkin. Riikkačoahkkin lea dollon jahkásaččat 1945 rájis ja árbevirolaččat miessemánus. Riikkačoahkkimii čoahkkanit áirasat sámiservviin, sámi ovttastusain ja ovttaskas sámit. Riikkačoahkkin mearrida guovddáš sámi jearaldagain, dohkkeha resolušuvnnaid, vállje sámi ovddasteddjiid sierra orgánaide Ruŧŧii ja olggobeallái Ruoŧa, ja maid ságastallá áigeguovdilis sámi jearaldagaid birra. Same Ätnama riikkačoahkkin vállje maid sátnejođiheaddji, stivrra, juhkosiid ja bargojoavkkuid organisašuvnna siskkobeallái.

Dávgát – Sámi sáhka Riikkaorganisašuvnnas Same Ätnamis
Dávgát lea Same Ätnama aviissa namma ja mearkkaša Karlavagnen (ruoŧagillii). Dainna go Same Ätnam lea boarráseamos sámi váldoorganisašuvdna, de leat máŋga nama boaresáigásaš stávvala mielde nugo maid organisašuvnna namma Same Ätnam. Dávgát aviisa maid stávejuvvo boares sámi ortografiija mielde.

Dávgádis lea leamaš stuorra mearkkašupmi sámi mytologiijas ja man čieža nástti ovddastit sámi giehtadávggi ja sámi njuola. Dávgát lea iežá sániiguin sámi sáhka sámi riikkaorganisašuvnnas.
Aviissa ulbmil lea addit lohkkái ságaid olles sámimáilmmis, muhto maid ráhkadit máhtu ja beroštumi sámijearaldagaid ja sámi kultuvrra birra. Dávgádis lea vuođđooaidnu sámi servodaga birra masa vuođđun lea Same Ätnama ulbmilprográmma ja oainnáhusat visot sámiid seamme rievtti ja árvvu birra. Dása gullá balanserejuvvon oaidnu sámiid birra mii ii veahket stereotiipiserema dahje álkidahttima.
 
Dávgát gávdno sihke aviisan ja neahttaprentehussan. Dávgát lea nuvttá Same Ätnama miellahtuide.
 
Eanet diehtojuohkima Dávgát ja dan neahttaprentehusa birra ođasmahttojuvvon sámi ođđasiiguin gávnnat dás www.davgat.se

Riikkaorganisašuvnna Same Ätnama Stivra
Riikkaorganisašuvnna Same Ätnama stivrras leat čieža lahttu válljejuvvon riikkačoahkkimis guovtti jahkái. Same Ätnama sátnejođiheddji jođiha stivrra. Same Ätnama stivra lea 1980-logu rájis dovddus leahkit sámimáilmmi dásseárvoseamos. Sámi dásseárvu lea guhká leamaš guovddáš jearaldat Same Ätnamii.   

Stivrabargu lea reglerejuvvon bargoortnegis.

Riikkaorganisašuvnna Same Ätnama Bargojuogus
Same Ätnama stivrabargu válbmejuvvo ja čađahuvvo bargojuhkosis. Bargojuogus váldá maid mearrádusaid unnit jearaldagain dainna lágiin ahte stivra sáhttá bidjat návccaid stuorra sámipolitihkalaš jearaldagaide. Same Ätnama sátnejođiheaddji jođiha bargojuhkosa.

Bargojuhkosa bargu lea reglerejuvvon bargoortnegis.

Riikaorganisašuvnna Same Ätnama Juogus ja Bargojoavkkut
Same Ätnamis leat máŋggat juhkosa, ja bargojoavkku ja prošeaktajođihanjoavkku. Visot dát orgánat leat seammas válbmejeaddji orgánat sámi jearaldagain iešguđet áššedovdesuorggis Same Ätnama stivrii earret válgaválmmastallanjovkui. Válgaválmmastallanjoavku lea friddja orgána riikkačoahkkimii. Visot juhkosiiguin, bargojoavkkuiguin ja prošeaktajođihanjoavkkuiguin ja maid Válgaválmmastallanjoavkkuin sáhttá váldit oktavuođa sin iežaset e-postačujuhusaid dahje Same Ätnama čállingotti bokte.

Riikkaorganisašuvnna Same Ätnama Sátnejođiheaddji
Same Ätnam dovddus das go 1945 rájis leat leamaš seamme ollu nissonolbmot ja dievdoolbmot sátnejođiheaddjin.

Same Ätnama dálá sátnejođiheaddji lea sámijurista Lars-Nila Lasko.
E-boasta; lars-nila.lasko@sameatnam.se

Riikkaorganisašuvnna Same Ätnama Čállingoddi
Same Ätnama čállingoddi lea Árviesjávrries gasku Sámieatnama. Same Ätnama čállingoddái lea dan dihte seamme guhkki davvisámiide go oarjánsámiide. Čállingottis barget čállingoddebargi ja prošeaktabargit.  

Boastačujuhus; Same Ätnam, box 25, 933 31 Árviesjávrrie.
E-boasta; kansli@sameatnam.se, info@ sameatnam.se, medlemsservice@sameatnam.se ja medlemskap@sameatnam.se

Dárkkisteapmi Same Ätnama ekonomiijas, doaimmas ja hálddašeamis
Same Ätnama ekonomiija, doaibma ja hálddašeapmi dárkkistuvvojit jahkásaččat sorjjasmeahttun ruhtadoallodárkkisteaddjiin mat buktet ovdan raportta riikkačoahkkimii.
Same Ätnamis lea dasa lassin iežas dárkkistanlávdegoddi mii geažoáiggi dárkkista olles Same Ätnama doaimma, hálddašeami ja ekonomiija.

Eanet diehtojuohkin Riikkaorganisašuvnna Same Ätnama birra
Lasi diehtojuohkima Same Ätnama birra sáhttá oažžut organisašuvnna almmolaš webbasajis www.sameatnam.se dahje jearaldaga bokte dása info@sameatnam.se.

Šatta miellahttu Riikkaorganisašuvnnas Same Ätnamis!
Šatta miellahttu dál! Miellahttomáksu lea 50 ru ovttaskassii, 100 ru veaga ovddas ja biddjo báŋkogiroi 5475-4262, Swedbank. Ale vajálduhte dieđihit nama, čujuhusa ja e-boastačujuhusa máksinguittes.  

Lasi diehtojuohkima miellahttovuođa birra Same Ätnamis ja miellahttoovdamuniid birra sáhttá oažžut organisašuvnna almmolaš webbasajis www.sameatnam.se dahje jearaldaga bokte dása medlemskap@sameatnam.se.